မြန်မာအစိုးရ တပ်မ ၅၅ အင်အား ၃၀၀ ကျော် တနိုင်းမှာ ရောက်

မြန်မာအစိုးရတပ် (ဘယ်)နှင့် ကေအိုင်အေတပ်ဖွဲ့

ကချင်ပြည်နယ် အနောက်ဘက် ဟူးကောင်းချိုင့်ဝှမ်းဒေသ ကချင်လွတ်မြောက်ရေးတပ်ဖွဲ့ KIA တပ်မဟာ (၂) နယ်မြေ တနိုင်းမြို့တွင် မြန်မာအစိုးရ တပ်မ ၅၅ မှ စစ်အင်အား ၃၀၀ ကျော် ရောက်ရှိနေကြောင်း ဒေသခံများဆိုသည်။
ယင်းစစ်ကြောင်းသည် အစိုးရတပ်စခန်းရှိသည့် အိန္ဒိယနယ်စပ်အနီး နန်ယွန် (Nan Yun)၊ ပန်ဆောင် (Pangsau)နှင့် ကချင်လွတ်မြောက်ရေးအဖွဲ့ KIO အိန္ဒိယနယ်စပ်ဆက်ဆံရေးရုံး (ROKA-I) ရှိရာသို့ စစ်အင်အားဖြည့်တင်းရန် ရည်ရွယ်ချီတက်လာခြင်းဖြစ်သည်ဟု ဒေသခံများဆက်ဆိုသည်။
ဒီဇင်ဘာ ၁၁ ရက်၊ ယနေ့ အင်္ဂါနေ့ထိ တနိုင်းမှ ထွက်ခွာခြင်းမရှိသေးကြောင်း သိရသည်။

လီဒိုလမ်းမတလျှောက် တပ်မ ၈၈ နှင့် နယ်မြေခံတပ်ရင်းများ၏ ကာကွယ်စောင့်ရှောက်ပေးမှုအောက် အရပ်ဝတ်ဖြင့် တပ်မ ၅၅ စစ်သားများသည် အစိုးရထိန်းချုပ်သည့် တနိုင်းမြို့သို့ ဒီဇင်ဘာ ၅ရက်မှ စတင် ၀င်ရောက်လာသည်ဟု ဒေသခံများ KNG ကချင်သတင်းဌာန သို့ပြောပါသည်။
အရပ်ဝတ် စစ်သားများသည် အရပ်သားများစီးသောကားများဖြင့် တရက်မှာ နည်းနည်းစီ မိုးကောင်းမှ တနိုင်းသို့ ၀င်ရောက်လာခြင်းဖြစ်ကြောင်း မျက်မြင်သက်သေများ ဆိုသည်။
ယခုလို အစိုးရ စစ်အင်အားသစ်များ KIA တပ်မဟာ ၂ နယ်မြေသို့ တိုးချလာခြင်းကြောင့် မကြာမီ တိုက်ပွဲများ ဖြစ်လာမည်ကို ဒေသခံများစိုးရိမ်နေကြောင်း သိရသည်။
ကချင်ပြည်နယ်တွင် အစိုးရနှင့် KIO ကြား တနှစ်ခွဲကြာ တိုက်ပွဲများဖြစ်ပွားနေသော်လည်း အခြားဒေသများနှင့် နှိုင်းယှဉ်လျှင် ဟူးကောင်းချိုင့်ဝှမ်းဒေသတွင် တိုက်ပွဲ နည်းပါးပါသည်။

http://kachinnews.com/burmese/news/1003-%E1%80%BB%E1%80%99%E1%80%94%E1%80%B9%E1%80%99%E1%80%AC%E1%80%A1%E1%80%85%E1%80%AD%E1%80%AF%E1%80%B8%E1%80%9B-%E1%80%90%E1%80%95%E1%80%B9%E1%80%99-%E1%81%85%E1%81%85-%E1%80%A1%E1%80%84%E1%80%B9%E1%80%A1%E1%80%AC%E1%80%B8-%E1%81%83%E1%81%80%E1%81%80-%E1%80%B1%E1%80%80%E1%80%BA%E1%80%AC%E1%80%B9-%E1%80%90%E1%82%8F%E1%80%AD%E1%80%AF%E1%80%84%E1%80%B9%E1%80%B8%E1%80%99%E1%80%BD%E1%80%AC-%E1%80%B1%E1%80%9B%E1%80%AC%E1%80%80%E1%80%B9.html

Posted in: ကချင်,ကချင်စစ်ဆင်ရေး,စစ်ဆင်ရေး,သတင်း